مرتبطه ؟! طب تعالى شوفى حبيبك هيتقدملك ولا هيديكى سكة

لو انتى مرتبطه عاطفيا تعالى شوفى حبيبك مش عايز يتقدم ليه لحد دلوقتى !!

أولا
ارتبطوا والحياة ظريفه ومبيتقدمش يبقى اكيد بتوفريله الحاجات دى:

1- بيشوفك وقت ما يعوز
2-بيتكلم معاكى طول اليوم
3- بيمسك اللى يمسكه عادى
4- وبتمسكى اللى بتمسكيه
5- البوس متوفر بغزاره
6- الأحضان ده شىء عادى
7- بتنتحرى عشان تساعديه

يبقى بذمتك يتقدم ليـــــــــه ؟!!

"اشترى البقره ليه لو باخد لبنها ببلاش ؟"

مثل أمريكى ناصح 

لازم يكون فى حدود لكل شىء
التليفونات بحدود
الخروج بحساب
والخدمة الشامله مفيش داعى منها..وألا يشيل المسؤليه ليه اساسا !!
ولو اشتغل فى سكة " لو كنتى بتحبينى كنتى عملتى " اعرفى يابنت الحلال انه مش بتاع جواز ده يإما بيشتغلك يا إما بيستغلك والاتنين وجهين لعمله واحده......"قلة الاصل"

لو ارتبطوا وبعد كده طلب انكوا تاخدوا بريك تعيدوا فيه تقييم العلاقه إعرفى ان ده مؤشر خطر وانه عايز يخلع بالذوق
فقولى له :لأ خلى البريك على طول ماعطلكش !!

بلاش تقعدى توجدى له اعذار وتصدقى كل حججه 

"أصله لسه بيكون نفسه"
مش عذر كافى !
أصل الراجل لما بيحب بجد بيتكلم حتى لو كان شحات..أصل دبلتين مؤقتا مش معضله

"خايف بابا ميوافقش عليه"
عذر اقبح من ذنب..طب هو كان جرب أصلا؟
ولو شايف انك متستاهليش المجازفة يبقى ميستاهلش يقابل بابا من أساسه !

"أصله بيسافر كتير "
ماشى وايه المشكلة؟
هو فى قانون ان الناس اللى بتسافر مش بتتجوز؟
بالعكس بقى اللى بيسافر ده لما بيحب بيروح ورا حبيبته لأخر الدنيا

"شغله واخد كل وقته"
ده تشوفيله سكرتيره مش زوجة ..!!
يعمل بيها ايه وهى ملهاش وقت عنده؟
لو كان بيحبك فعلا كان فضى نفسه نص ساعه يقابل فيها باباكى
الراجل لما بيحب بجد بيخلق الوقت وبيعمل المستحيل 

"أصل أهله عايزين يجوزوه بمعرفتهم"
ده بقى مالوش غير رد واحد
(( يا نونو خليك جنب ماما ))
وخليها بجميله واشتري له مصاصه
الراجل اللى بيحب بجد بيحارب العالم عشان اللى بيحبها

"أصله بيخاف من الجواز"
 هاتيله طاسه الخضه
الراجل لما بيحب بجد مابيخافش من اى حاجه فى الدنيا
وممكن يرمى نفسه فى النار فى سبيل انه يكون جنب حبيبته !!

"أصله مش بيحب التسرع"
طب ربنا يدينا ويديكى طوله العمرررر
ومستنين دعوة فرحك على الستين ربيعا إن شاء الله
وهنجيب لكم الهدايا أطقم عضاضى
يابنتى العمر بيجرى ..إجرى انتى كمان وسيبى الراجل البطة ده يكاكى

"أصله إنسان كويس قوى"
لو كان كده فعلا كان بقى واضح معاكى من أولها الأنسان الكويس مبيلعبش ببنات الناس
ولو كويس بس مش بيحبك يبقى ايه فايدته؟ كويس لنفسه يا حبيبتى مش ليكى أو لواحده تانيه غيرك تعرف تلعبه على الشناكل

"أصلى بحبه"
بصى يا حبيبتى..سكة بحبه مهما اشوف منه دى متنفعش خالص الا اذا كنتى بتحبى البهدله وفى الحاله دى كلمينى وانا هديكى نمرة د/خشبة كويس وهما جلستين ...وهتبقى زى الفل

"أصلى خايفه ملاقيش غيره"

"أصل مبقاش فى رجالة"
طول مانتى بتفكرى كده يبقى هتفضلى ترضى بأى زباله تقابليها فى سكتك..
الرجالة على قفا من يشيل بس انتى اخلصى من التهمه اللى معاكى وقصه (قرد يسلينى ولا غزال شارد)
دى فاشـــــــــلة
طب ارضى بالقرد ليه  إذا كان فى غزال ؟؟

"أصله متجوز مش عايزاه يشرد عياله"
طب وأما هو متجوز وملتزم بولاده انتى بقه يا حلوه بتعملى ايه فى حياته؟ بتسليه؟ بتشبعى غروره ونقصه؟
ولا بياخد منك اللى مش عارف ياخده من المدام؟؟
متخليش حد يستغلك وبلاش تاخدى اللقب ده (خرابة بيوت ) لأنه اسوء لقب دنيا وآخره

"عصفور فى اليد خير من 10 على الشجره"
ده فى حاله انه يكون عصفور مش بومه !!
أبوس ايدك أفهمى المثل صح

طول مانتى رابطه نفسك بقصه خايبه مش هتلاقى رجالة تانيه لأنك ببساطه انتى اللى معميه نفسك ومش شايفه غيره
لكن صدقينى لو نفضتيله النهارده وشيلتيه من دماغك بكره - اللى هو بكره ده- هتلاقى 1000 واحد يتمناكى
احنا فى عصر الانترنت والفيسبوك

الإنسان اللى يخليكى طول علاقتك بيه بتدوريله على أعذار يبقى عذره الوحيد انه محبكيش

الحب...
يايكون إضافه جميلة فى حياة الإنسان...ياإما يغور فى ستين داهيه
لانه ساعتها مايبقاش حب..بيبقى نوع من الوسواس القهرى أو حب تعذيب النفس وبرضو كلمينى وهديكى نمره د/ خشبة

الحب لازم يكون نابع من القلب والعقل..لكن حب من غير عقل يبقى حب ناقص مشوه غير مكتمل النمو يعنى من الآخر مش هيعيش كتير ومتوجعيش دماغنا بقه

الحب لازم يعقد معاهده سلام بين قلبك وعقلك
لكن يخليهم طول النهار يتخانقوا مع بعض !! يبقى مصيرك العباسية

الحب من غير أمل هو نوع من أنواع الهبل

العلاقة الناجحه هى:العلاقه اللى بتحقق لك السعادة على طول
مش شهر آه وشهرين خناق !! يوم آه وعشره متخاصمين
خروجه آه وتلاته مش طايقين نفسنا
علاقتك من النوع ده؟ يبقى متعتبريش السنارة غمزت
وبلاش جواز علشان متجنيش على اطفال بلا ذنب لإن عاجلا أم آجلا حد فيكم هيطفش